Êrîşên dagîrkerî yên Îranê jî, di vê çarçoveyê da pêktên. Armanca Îranê, têkbirina Bizava Azadîya Kurd û herweha têkoşîna seranserî ya Kurdistanê ye. Êdî yar û neyar û hemû cîhan jî qebûl dike ku Qendîl bûye çeperê herî xurt û saxlem yê Kurd û Kurdistanîyan û destkevtîyên gelê Kurd li çar parçeyan. Bizava gelê Kurd û Kurdistanîyan û têkoşîna şoreşgerî ya Bizava Azadîya Kurd, ku wekî pêşengê serhildana gelên Rojhilata Navîn derketîye meydanê, desthilatdarîyên despot û diktator ditirsîne. Serkevtina gelê Kurd, tête manaya serkevtina gelên li herêmê. Tirsa desthilatdarîya Iranê û Ayetullahan, tirsa desthilatdarîya Tirkîyê û generalan jî ev e. Dewleta Tirkîyeyê û desthilatdarîya AKPê jî, dixwazin ertêşa taybet û hêzên polîs yên taybet organîze bikin. Eve jî dide xuya kirin ku dewleta Tirkîyeyê, digel destek û alîkarîya dagîrkerîya Iranê, li Bakura Kurdistanê jî proseseke nû, ya çete û kontrayan bide destpêkirin. Ji alîyê dî ve, Îran û dewleta Tirkîyeyê dixwazin, dîroka bextreş ya birakujîyê jî bidin dest pê kirin. Pêwîst e gelê Kurd û Kurdistanî û hemû hêzên polîtîk yên Kurd û Kurdistanî li hemberî van siyasetan hişyar bin.
Di vê prosesa ku dagîrkerên Kurdistanê careke dî dagîrkerî û qirkirina gelê Kurd dane dest pê kirin da, divêt ku hêzên Kurd û Kurdistanî bi dilsozîya welatparêzî û şorşegerî, ji bo jîyaneke bi rûmet û parastina biha û destkevtîyên gelê Kurd û Kurdistanîyan yêkitîya xwe vehûnin. Hêza xwe bikin yêk û parastina xwe bi xwe bikin. Ji bilî yêkitîya Kurd û Kurdistanîyan çu rêyên dî li ber gelê Kurd û Kurdistanîyan nemane. Dagîrkerîya Iranê, li dijî tevahîya gelê Kurd û Kurdistanîyan û bi taybetî li dijî destkevtîyên Kurdistana Federal e. Desteka dewleta Tirkîyeyê jî bi vê mebestê ye û armanca wan ew e ku, duyemîn car axa Kurdistanê dagîr bikin û gelê Kurd li çar parçeyên Kurdistanê dîl bigirin.
Başûra Kurdistanê ji 16ê Tîrmehê û vir ve di bin êrîşên dagîrkerîya ertêşa Iranê da ye. Êdî armanca desthilatdarîya Ahmedînejad û Ayetullahên Îranê aşkera bûye û hedef Herêmên Parastinê yên Medyayê û herwisa Bizava Azadîya Kurd û Kurdistana Federal e.
Bi vê mexsedê em wekî KNK, bang li Kurd û Kurdistanîyan, li rêxistin û hêzên Kurd û Kurdistanîyan, li sazî û dezgehên sivîl yên Kurd û Kurdistanîyan, li ronakbîr, nivîskarên Kurd û Kurdistanîyan dikin ku li dijî dagîrkerîya hêzên ertêşa Iranê û kiryarên kîndarî yên dewleta Tirkîyeyê dengê xwe bilind bikin û di her meydana lê dijîn da, dijberîyeke xurt nîşan bidin.
Pêdivî ye gelê Başûra Kurdistanê, hêzên siyasî û desthilatdarîya Kurdistana Federal jî li dijî dagîrkerîya Iranê reftareke xurt ya neteweyî bidine xuya kirin.
Kurdên li Rojhilata Kurdistanê, Kurdên li Rojava û Bakura Kurdistanê û Kurdên li derveyî welat bi giştî li dijî dagîrkerîya hêzên ertêşa Iranê li her derê têkoşînê bidin dest pê kirin.
Hewce ye gelê Kurd û hemû Kurdistanî, baş bizanin ku dewletên dagîrker, li dijî tevahîya Kurd û Kurdistanîyan faşîzmeke xedar dimeşînin û di şexsê gelê Kurd da li dijî gelên Rojhilata Navîn şer dane detspêkirin.
Em wekî KNK bang li hêzên navneteweyî, li demokrat û sazîyên mafên mirovan yên navneteweyî, li Neteweyên Yêkbûyî, Yêkitîya Ewrûpa û bang li wijdana bîr û rehîya giştî ya navneteweyî dikin ku, li hemberî dagîrkerîya Iranê û li hemberî kiryarên qirkirina dewleta Tirkîyeyê bêdeng nemînin. Iran bi vê êrişê heta nihe se (3) sivîl kuştine, bi dehan kes birîndar kirine, bi dehan gund vala kirine û bi sedan kes ji cih û warên xwe dane koç kirin, xwezaya Kurdistanê daye ber agir, pez û dewarên xwecihan telifandine ku eve di rapora HRW da jî tesbît bûye. Iran di çeperekî fireh da dijî Kurd û Kurdistanîyan di nav kuşt û kuştdarîyeke bêtixûb da ye û hemû normên şer yên navneteweyî jî binpê dike.
Pêwîst e bîr û rehîya giştî ya cîhanê, sazî û dezgehên mafên mirovan bizanin ku li Başûra Kurdistanê, li Qendîl û li ser tixûbê Iranê mirovahî tête kuştin. Her bi çi rengî be, tiştekê bikin, bêdeng û bêhereket nemînin!.
Konseya Rêvebir ya KNKê
27. 07. 2011
—
Kurdistan National Congress – KNK
Rue Jean Stas 41,
1060 Brussels
Tel: +32. 2647 3084
Fax: +32. 2647 6849
website: www.kongrakurdistan.net
e-mail: [email protected]
